Guhkesáigásaš sámepolitihkkár ja ovddeš sámedikki ságadoalli Pekka Aikio ii jáhke, ahte Suopma boahtá goassige ratifieret ILO-soahpamuša.
Aikio lea seamma oaivilis dutki Mattias Åhreniin das, ahte suopmelaččat eai hálit dohkkehit sápmelaččaid sierra álbmogin. Váldoálbmot atná min váralažžan ja uhkin, čuoččuha Aikio.
- Mun lean álo dadjan, ahte in jáhke ILO-soahpamuša ratifieremii. Suomas dat ii leat vejolaš nu guhká, go suopmelaččat eai atte sierra sajádaga sápmelaččaide.
Aikio eahpida, bastágo stáhtaministtar Jyrki Katainen ratifieret ILO-soahpamuša, jus eará bellodagat ja presideanta eai doarjjo dan.
- Mun jáhkán, ahte dat lea nu váttis ášši Suomas, go stáhtaministtar Jyrki Katainen lea lohpidan ILO-soahpamuša ratifierema. In dieđe, leago son doarvái garra olmmoš ollašuhttit dan, eandalit jus eará bellodagat eai duostta dan dahkat.
- Suoma dásseválddi presideanta Sauli Niinistö fas lea hupman dan birra, ahte ovtta álbmogii ii sáhte addit sierra vuoigatvuođaid, jus dat leat eret nuppi álbmogis. Iihan dat leat dat áigumuš, Niinistö gal lea boastut dalle ipmirdan, lohká Aikio.